Von Nadine Mory
Himmel Sakrament, wie jedes Joor an huara Krampf zum dia Däscha wiedr zuazbringa.
Wobi me das Joor sini 6-7 Langarm würklich hät chönne dehei lo, so schön Wätter hämmr gha!
No bleich vom chli garstige Wätter simmr au das Joor über Ostere mit 2 Büssli inkl. Ahänger und PKW‘s ins Südtirol tuckeret. So händ au in däm Joor ca. 40 Persone chönne debi si.
Im Geografie-Büssli vo Stocker Reisen isch wieder mol super gueti Stimmig gsi und me het defür gsorgt, dass unseri geografische Kenntnis ufgfrüscht
wärde. Für die eint oder de ander isch au gueti Mucke gloffe😝
Im Heidiland en churze Abstächer und weida geeehts. PS: Lustig wie viel plötzlich wieder zu chline Chinder wärde, wenns ums Zahle vom WC goht🤔
Nach em letschjöörige Vollstipper im Autoverlad und em Marderschade, simmr alli numme froh gsi, s mit em 2. Büssli im Schlepptau übere Pass z schaffe.
Endstation vo de hütige Reis isch denn s Hotel Montani gsi, wo mir wieder härzlich empfange worde sind!
Zum nach sonere lange Fahrt wieder so richtig in Schwung zcho, heissts ab ufs Stadion. ☝🏻Also jogge natürlich. Immer wieder schön, die Öpfelbäum z beguetachte, aber irgendwenn muesch di halt uf
anders konzentriere...😮💨
Die folgende 6 (es sind würklich 6 nid 7) Täg sind vo hartem Training, Spass und natürlich usgezeichnetem Ässe prägt gsi. Öbs während em Ässe so lut gsi sig wie inere Zitat: „Kantine“ isch zwar
frogwürdig, aber me chas halt nid allne rächt mache😌
Was bezüglich Training notürlich au no erwähnt wärde muess isch e witeri Story eines Tütschen:
Hesch gwüsst - Alles wo nid mit eme Handtüechli bsetzt isch chan me nämlich immer in Beschlag neh au die 6-7 ufgstellte Hürde… 😎nächstmol muess ebe doch im Matti sis Späckbadtüechli anehebe 🤷🏽♀️
Mir händ notürlich trotzdem chönne an unserer Hürde-,Speer-,Witsprungtechnick und was es alles no git, fiele.
Dank de legendäre Spieliöbe mit de zahlrich (6-7🤔) unschuldig umbrochte Füdlibürger bim Werwölfle, de gfüllte Bildigslücke über Panzer, de Info wie gföhrlich Fondue Chinoise doch sie chan und em
doch sehr aspruchsvolle Würfle bim Perudo isch au am Obe immer gueti Stimmig gsi.
Vellicht ligts bi de eint oder andere zwar au am Dessert, aber pssssst😜
De Sunntignomi isch ganz im Zeiche vo Teamarbet gstande: 4 verschideni Teams drätte in verschiedene Spieli gägenand a. Volle Isatzt isch gforderet gsi. Sigs im Papierflieger falte, Geografiequiz,
Wordle oder divärse Stafette. Do hets im Doublespiel bispielswis en Doubleslideshow gäh, sehr idrücklich gsi. Und probier mol 11-12 Schoggieili ins Muul znäh, denn alli mitenand zerbisse und
abezschlucke. Machs lieber nid, het nid usgseh als wärs fein gsi, aber ich säg nume Hamster/in EFZ🤯
Am Änd vom Tag het dä Wettkampf s Team „Gälbe Schnee“ für sich chönne entscheide. Was für en kreative Name das doch isch.
Witeri harti Trainings prägt vo Muskelkater und leider au ere Zerrig (wo das Joor wieder an d Athlete got) spöter, stoht au scho de letscht Tag vor de Düüre:
Am letschte Nomi wo mir alli zäme öbbis uf em Stadion unternähme, han ich jo uf em Kunstrase es Déjà-vu gha. Du au Roman? Aber kei Angst ich glaub diesmol bisch nid du Schuld gsi, dass d Luna
usgseh het, als hät sie sich prüglet 😂 und au de Marco het uf sini Slideshow verzichtet und die öper anderem überloh. Autsch. Ich hoff euch gots wieder besser… Nach tolle Duelle im Hüülerspiel
und Fuessball hämmr uns s spändierte Glace wohl verdient. Het jetzt eigentlich öpper Whiskyglace gno?!
Und scho isch de letschti Obe cho… Ei letschtsmol unter em Roman sim „nume ei Chelle vo jedem Salat“-Blick, Salat schöpfe, feins 3-Gänge Menü gniesse, Spieli spiele bis eim d Auge fascht zuegheie
und Gossip über Muttenz ghöre.
Denn heissts wieder: Rissverschluss zuebringe, istiige und ab nach Hause. Trotz em eint oder andere bleiche Gsicht (vellicht so 6-7, was meinsch du Noée?) uf em Pass, sind alli wohlbehalte und
sonnengebräunt wieder in Muttenz acho.
Jetzt blibt eim wohl nüt meh anders übrig als in Errinnerig zschwelge und die schöne Momänt nomol Revue passiere lo. Drum lueg doch au gärn no in d Bilder-Galerie oder uf unserem Insta-Profil
verbi, mit vielne lustige Reels. Viel Spass bim Stöbere.
PS: und wau, wie schönn chans Läbe ohni Muskelkater sie😌
Ich möcht mich an däre Stell nomol bi allne bedanke, wo in irgendere Art und Wiis das Lager unterstützt händ! Danke an alli Trainer, Fahrer, Sponsore, Busmiete.ch und speziell de Familie Bachmann
und ihrem Team vom Hotel Montani wo uns über die ganz Wuche hinwäg mit feinem Ässe verwöhnt het.🙏🏼
Fotos folgen…
